Bifreið

Almennar reglur um innflutning

Ökutæki sem ætlað er til aksturs í Finnlandi þarf að skrá hjá Tollstjóra svo hægt sé að reikna út gjöld vegna ökutækisins. Einnig verður að skrá ökutæki hjá Tollstjóra sem flutt eru inn frá öðrum ríkjum en ESB-ríkjum, Noregi og Íslandi. Tollstjóri ákveður tolla og önnur gjöld og veitir leyfi til skráningar á ökutækinu. Nánari upplýsingar eru á vef Tollstjóra (www.tulli.fi).

Notkun fyrir skráningu

Ökutæki sem á að skrá í Finnlandi má aka skattfrjálst í allt að þrjá mánuði. Þó að því tilskildu að búið sé að tilkynna Tollstofu um fyrirhugaðan akstur áður en hann hefst í Finnlandi. Ef ökutækið er ekki skráð á EES-svæðinu eða skráningin er gengin úr gildi þarf að sækja um innflutningsleyfi hjá bifreiðaeftirlitsstöð eða Tollstjóra. Þá þarf ökutækið að vera tryggt samkvæmt finnskum lögum. Ökutækið þarf að skrá til skattlagningar áður en fimm dagar eru liðnir frá því að tilkynning um akstur hefur verið staðfest. Að öðrum kosti gengur akstursleyfi úr gildi.

Flutningafarartæki

Flutningafarartæki frá öðrum ríkjum en ESB-löndum, Noregi og Íslandi eru undanþegin tollum og virðisaukaskatti ef þau uppfylla kröfur um tollfrelsi. Lækka má innflutningsgjöld á ökutækjum um allt að 13.450 evrum ef skilyrðum sem kveðið er á um í lögum um gjöld af bifreiðum er fullnægt. Aðeins er hægt að samþykkja lækkun innflutningsgjalda á ökutækjum sem innflytjandi tekur með sér inn í landið.

Gjöld má lækka ef eftirfarandi skilyrði eru uppfyllt:

Einstaklingur flytur ökutækið inn til eigin nota
Sá sem ökutækið flytur inn er kominn til að setjast að í landinu
Eigandinn hafi dvalist erlendis í samfleytt a.m.k. eitt ár áður en flust er til Finnlands.
Ökutækið hafi við flutninginn verið í eigu innflytjanda eða maka hans, eða umráðum sem leiða til eignarréttar, eða innflytjandinn hafi notað það í a.m.k. sex mánuði.
Ökutækið sé flutt inn í landið í tengslum við búferlaflutninga.
Eigandinn hafi ekki stundað fullt nám árið áður en flutningur á sér stað.
Hafi innflytjandi áður flutt inn farartæki með lækkuðum eða engum innflutningsgjöldum, er gert ráð fyrir að ekki hafi verið hægt að flytja það inn án gjalda á tímabili í aðdraganda flutningsins til Finnlands.

Að öðrum kosti þarf innflytjandi að greiða innflutningsgjald af ökutæki sem flutt er inn sem hluti af búslóð, og er þá miðað við þá upphæð verðsins sem er hærri en skattleysismörk. Tilkynnt er um innflutningsgjöld farartækis hjá Tollstjóra. Tollstjóri annast útreikninga á innflutningsgjöldum og tilkynnir skriflega um ákvörðun þar að lútandi. Um leið er veitt leyfi til skráningar á ökutækinu. Nánari upplýsingar eru á vef Tollstjóra (www.tulli.fi).

Tímabundinn skattfrjáls akstur ökutækis

Einstaklingar sem eiga lögheimili annars staðar en í Finnlandi geta flutt inn tímabundið ökutæki sem eru skráð í öðru ríki án þess að greiða af þeim innflutningsgjöld. Þá er aksturleyfi veitt ferðamönnum og öðrum sem aka erlendum fyrirtækjum vegna starfa sinna.

Í sumum tilvikum geta einstaklingar með lögheimili í Finnlandi ekið tímabundið farartækjum sem eru skráð erlendis án þess að greiða af þeim innflutningsgjöld. Lög um innflutningsgjöld ökutækja kveða á um níu flokka þar sem hægt er að veita tímabundna undanþágu frá skatti vegna aksturs á erlendu ökutæki. Það á t.d. við um þjónustu eða viðgerðir á bifreiðum, eða þegar óskráðar bifreiðar eru fluttar innanlands með leyfi skattayfirvalda frá lendingarstað eða til útflutningsstaðar. Þá má aka bifreið tímabundið án þess að greiða gjöld, ef það er í tengslum við prófanir eða kynningar. Þá fela lögin í sér ákvæði um tímabundinn akstur bifreiða í eigu fyrirtækja án þess að greiða þurfi innflutningsgjöld. Nánari upplýsingar eru á vef Tollstjóra (www.tulli.fi).

Skráning

Við skráningu ber að hafa eftirfarandi gögn meðferðis:

Gild trygging fyrir akstri.
Vottorð um skoðun við skráningu.
Skráningarskírteini frá og með síðasta erlenda eiganda. Sé maður búinn að fá tilkynningu um bifreiðaskatt og hefur hana meðferðis, er nóg að hafa skráningarskírteini meðferðis með nafni þess sem er á tilkynningunni um bifreiðaskatt.

Ökutæki sem flutt eru inn í landið þurfa að fara í gegnum skoðun áður en þau eru skráð á skoðunarstofum. Þá þurfa skjöl sem ökutækinu fylgja að sýna fram á að ökutækið uppfylli allar kröfur. Upplýsingar um hvaða skjala er krafist við skoðun vegna skráningar er að finna á vef um skoðunarstofur (www.ake.fi ).

Þegar bifreið hefur verið skoðuð eða samþykkt er hægt að skrá hana. Að skráningu lokinni fær eigandinn skráningarskjöl og finnsk skráningarmerki. Verið viðbúin því að þurfa að sýna persónuskilríki við skráningu bifreiðar.

Nánari upplýsingar um skráningu bifreiða fást hjá Skráningarstofu ökutækja í síma +358 (0)20 696 330 eða á vefslóðinni www.ake.fi.

Fannstu ekki það sem þú leitaðir að?

Síðast uppfært 12.01.2010