Bankar og tryggingar í Finnlandi

Bankareikningur og bankaþjónusta í Finnlandi

Bankar bjóða upp á ýmsar tegundir bankareikninga fyrir dagleg bankaviðskipti, sparnað og aðra ávöxtun. Bankarnir bjóða upp á mismunandi kjör.

Ekki er krafist finnskrar kennitölu við stofnun bankareiknings en viðskiptavinir þurfa þó ætíð að sýna persónuskilríki. Öruggast er að vísa fram gildu vegabréfi eða opinberum persónuskilríkjum. Í sumum bönkum nægir að sýna norrænt ökuskírteini.

Hafi viðskiptavinur ekki finnska kennitölu getur honum reynst erfitt að fá t.d. greiðslukort eða aðgang að netbanka.

Oft þarf gild rök fyrir því að njóta grunnþjónustu bankanna, t.d. þarf viðskiptavinurinn að eiga lögheimili í Finnlandi, starfa þar eða stunda nám. Til sönnunar á starfi er hægt að sýna ráðningarsamning eða launaseðil. Námsmenn geta framvísað námsvottorði frá menntastofnun eða háskólaskírteini. Þá er hægt að biðja bankann í því landi sem flutt er frá um að skrifa meðmæli til staðfestingar á að viðskiptavinurinn sem hyggst stofna bankareikning sé viðskiptavinur hjá viðkomandi banka. Bankarnir hafa leyfi til að kanna fjárhagsaðstæður viðskiptavinar sem hyggst stofna bankareikning.

Nánari upplýsingar um bankaviðskipti í Finnlandi veita bankarnir sjálfir og Trygginga- og fjármálaráðgjöfin(www.fine.fi).

Tryggingar

Fyrir utan lögbundnar tryggingagreiðslur (t.d. lífeyri og sjúkratryggingar) eru ýmsar aðrar tryggingar, þar á meðal ábyrgðar- og slysatrygging eigenda ökutækja, kaskótryggingar og heimilistryggingar. Heimilistrygging er t.d. skilyrði fyrir því að fá leiguhúsnæði. Öllum eigendum vélknúinna ökutækja er skylt að kaupa ábyrgðar- og slysatryggingu, en þeim er frjálst hvort þeir velja s.k. kaskótryggingu. Nánari upplýsingar um nauðsynlegar tryggingar veita tryggingafyrirtæki í Finnlandi og Trygginga- og fjármálaráðgjöfin (www.fine.fi).